📘 निबेदन
📚 शब्दभण्डार
१. दिइएका शब्द र अर्थबिच जोडा मिलाउनुहोस् :
| शब्द | अर्थ |
|---|---|
| उद्देश्य | लक्ष्य, ध्येय |
| घरेलु | घरायसी |
| सहजीकरण | सरल बनाउने काम |
| कौशल | प्रवीण |
| सहकार्य | सँगसँगै गरिने काम |
| तलब | काम गरेबापत मासिक रूपमा पाउने रकम, वेतन |
२. अनुच्छेदबाट आगन्तुक शब्द, सिङ्गो शब्द र सङ्क्षिप्त रूप पहिचान गर्नुहोस् :
| प्रकार | शब्दहरू |
|---|---|
| आगन्तुक शब्द | फोन, भाइबर, स्काइप, मेसेन्जर, टेलिभिजन, फेसबुक, लाइभ, मेयर आदि। |
| सिङ्गो शब्द | न्वाँगी, शताब्दी, परम्परा |
| सङ्क्षिप्त रूप | ने.प्र.प्र., रा. स. सं., का.म.पा. |
३. दिइएका शब्दहरू प्रयोग गरी एउटा अनुच्छेद लेख्नुहोस् :
शब्दहरू : शैक्षिक, बालक्लब, अपराध, आचरण, हकहित, संस्कृति, परिवर्तन
=> उत्तर: विद्यालयका शैक्षिक गतिविधिलाई प्रभावकारी बनाउँदै विद्यार्थीहरूको सहभागितामा बालक्लब स्थापना गरिएको छ । बालबालिकासँग सम्बन्धित अपराध तथा हिंसाका घटनालाई नियन्त्रण गर्न क्लबले सचेतनामूलक अभियान सञ्चालन गर्छ । विद्यार्थीमा देखिने अनुचित आचरण सुधार गर्नुका साथै उनीहरूको हकहितको संरक्षणमा पनि क्लबले काम गर्छ । स्थानीय संस्कृति र परम्पराको संरक्षणका लागि सांस्कृतिक कार्यक्रम आयोजना गरिन्छ । यस्ता रचनात्मक गतिविधिमार्फत समाजमा सकारात्मक परिवर्तन ल्याउन बालक्लबले महत्त्वपूर्ण भूमिका खेल्न सक्छ ।
📝 बोध र अभिव्यक्ति
१. दिइएका शब्दको शुद्ध उच्चारण गर्नुहोस् :
| शब्द | उच्चारण |
|---|---|
| संरक्षण | सम्रक्छ्यन् |
| सिर्जनात्मक | सिर्जनात्मक् |
| विसङ्गति | बिसङ्गति |
| आर्थिक | आर्थिक् |
| मार्गदर्शन | मार्गदर्सन् |
| न्यूनीकरण | न्युुनिकरन् |
| भविष्य | भविस्य |
| कोष | कोस् |
२. ‘निवेदन’ पाठ सस्वरवाचन गरी साथीहरूको वाचनसम्बन्धी पक्षमा छलफल गर्नुहोस् ।
=> उत्तर: पाठ वाचन गर्दा उच्चारणको शुद्धता, बोल्ने गति, समयको उचित प्रयोग, हाउभाउ र प्रस्तुतिको प्रभावकारिताजस्ता पक्षमा ध्यान दिनुपर्छ । साथीहरूको वाचनपछि यी पक्षलाई आधार बनाएर राम्रो भएका कुरा तथा सुधार गर्नुपर्ने पक्षबारे आपसी छलफल गर्नुपर्छ ।
३. अनुच्छेदका आधारमा निम्न प्रश्नहरूको उत्तर दिनुहोस् :
(क) निवेदन लेख्नुको प्रयोजन के हो ?
=> उत्तर: आफ्नो माग, अनुरोध वा कुनै आवश्यक विषय सम्बन्धित व्यक्ति वा कार्यालयसमक्ष औपचारिक रूपमा राख्न निवेदन लेखिन्छ ।
(ख) निवेदनमा मिति कहाँ उल्लेख गरिन्छ ?
=> उत्तर: निवेदनको माथिल्लो सिरानमा दायाँतर्फ मिति लेखिन्छ ।
(ग) निवेदनमा विषय किन राखिन्छ ?
=> उत्तर: निवेदनमा उठाइएको मुख्य विषय, माग वा उद्देश्यलाई छोटकरीमा स्पष्ट पार्न विषय राखिन्छ ।
(घ) निवेदकले आफ्नो आग्रह कहाँ प्रस्तुत गर्छ ?
=> उत्तर: आवश्यक विषयवस्तु प्रस्तुत गरिसकेपछि निवेदकले आफ्नो आग्रह वा अनुरोध स्पष्ट रूपमा राख्छ ।
४. प्रश्नहरूको मौखिक उत्तर दिनुहोस् :
(क) उक्त निवेदन कसले कसलाई लेखेको हो ?
=> उत्तर: हिमगङ्गा माध्यमिक विद्यालयको सिर्जनशील बालक्लबका अध्यक्षले रामेछाप नगरपालिका वडा नं. ३ का वडाध्यक्षलाई निवेदन लेखेका हुन् ।
(ख) निवेदनमा कस्तो सहयोगको माग गरिएको छ ?
=> उत्तर: बालहिंसा तथा सामाजिक दुर्व्यवहार न्यूनीकरणका लागि बालक्लबले विभिन्न सचेतनामूलक कार्यक्रम सञ्चालन गर्न लागेको छ । त्यसका लागि स्थापना गरिएको अक्षयकोषमा आर्थिक सहयोग उपलब्ध गराइदिन वडा कार्यालयसमक्ष अनुरोध गरिएको छ ।
(ग) किशोरकिशोरीले आफ्ना समस्या कसरी समाधान गर्न सक्छन् ?
=> उत्तर: किशोरकिशोरीले आफ्ना समस्या खुलेर व्यक्त गरी सम्बन्धित व्यक्तिसँग छलफल गर्नुपर्छ । समस्याका कारण र समाधानका सम्भावित उपाय पहिचान गरेर अघि बढ्नुपर्छ । उनीहरूमा सिर्जनात्मक क्षमता, सकारात्मक सोच, जीवनोपयोगी सीप र आवश्यक चेतनाको विकास गराउन सकेमा आफ्ना समस्या समाधान गर्न उनीहरू अझ सक्षम हुन्छन् ।
(घ) साइबरको उचित प्रयोग कसरी गर्न सकिन्छ ?
=> उत्तर: बालहिंसा तथा सामाजिक दुर्व्यवहारविरुद्ध सञ्चालन गरिएका सचेतनामूलक गतिविधि साइबर माध्यमबाट धेरै मानिससम्म पुर्याउन सकिन्छ । बालहिंसा न्यूनीकरण, बालअधिकारको संरक्षण र सामाजिक सुधारसँग सम्बन्धित सूचना तथा सन्देश प्रसारण गरेर साइबरको सदुपयोग गर्न सकिन्छ ।
५. पाठका आधारमा निम्न प्रश्नहरूको उत्तर दिनुहोस् :
(क) बालक्लब स्थापना गर्नुको उद्देश्य के हो ?
=> उत्तर: विद्यालय तथा समाजमा हुने बालहिंसा र सामाजिक दुर्व्यवहारका विषयमा जनचेतना फैलाउनु तथा त्यस्ता समस्यालाई घटाउनु बालक्लबको प्रमुख उद्देश्य हो ।
(ख) बालक्लबले सचेतना कार्यक्रम कहिले र कहाँ सञ्चालन गर्ने योजना बनाएको छ ?
=> उत्तर: विद्यालय बिदा भएको समयमा गाउँ तथा सहरका मुख्य स्थानमा पुगेर सचेतनामूलक कार्यक्रम सञ्चालन गर्ने योजना बालक्लबले बनाएको छ ।
(ग) सचेतना फैलाउन बालक्लबले कुन-कुन माध्यम प्रयोग गर्ने भएको छ ?
=> उत्तर: बालक्लबले लघुनाटक, प्रहसन, सूचना प्रवाह तथा आपसी छलफलजस्ता माध्यमबाट जनचेतना फैलाउने योजना बनाएको छ ।
(घ) अक्षयकोषका लागि आर्थिक स्रोत कसरी जुटाइएको छ ?
=> उत्तर: विद्यालयका शिक्षक तथा कर्मचारीले एक दिनको तलब सहयोग गरेका छन् । साथै, वडा कार्यालय र स्थानीय सङ्घसंस्थाबाट समेत आर्थिक सहयोग प्राप्त गरी अक्षयकोषको रकम वृद्धि गर्ने योजना बनाइएको छ ।
६. नयाँ वर्षको अवसरमा शुभकामना पत्र तयार गर्नुहोस् :
उत्तर :
श्री ............................... ज्यू,
**शुभकामना**
नयाँ वर्ष २०८० को सुखद अवसरमा तपाईँ तथा तपाईँको परिवारमा सुख, शान्ति, समृद्धि र सुस्वास्थ्य कायम रहोस् भन्ने हार्दिक शुभकामना व्यक्त गर्दछु । नयाँ वर्षले तपाईँहरूको जीवनमा खुसी, सफलता र नयाँ उत्साह ल्याओस् ।
घनश्याम थामी
७. शैक्षिक भ्रमणका लागि आवश्यक प्रबन्ध मिलाइदिन अनुरोध गर्दै प्रधानाध्यापकलाई निवेदन लेख्नुहोस् :
उत्तर :
मिति : २०८९।०३।५
श्रीमान् प्रधानाध्यापक,
भक्तपुर इङ्लिस सेकेन्डरी स्कुल,
मध्यपुर थिमी, गठ्ठाघर ।
विषय : शैक्षिक भ्रमणका लागि प्रबन्ध मिलाइदिनुहुन ।
महोदय,
विद्यार्थीले विद्यालयमा प्राप्त गर्ने ज्ञान पाठ्यपुस्तकमा मात्र सीमित रहँदैन । कुनै स्थान, वस्तु वा विषयलाई प्रत्यक्ष रूपमा हेरेर प्राप्त गरिएको ज्ञान बढी प्रभावकारी र दीर्घकालीन हुन्छ । विभिन्न ठाउँको भ्रमण गर्दा पुस्तकमा अध्ययन गरिएका विषयलाई वास्तविक परिवेशसँग जोडेर बुझ्ने अवसर प्राप्त हुन्छ । त्यस्ता अनुभवले विद्यार्थीको ज्ञान विस्तार गर्नुका साथै व्यवहारिक जीवनमा समेत उपयोगी आधार तयार गर्छ ।
यसै उद्देश्यलाई ध्यानमा राखी कक्षा ९ का हामी सम्पूर्ण विद्यार्थीहरू नेपालका केही उपयुक्त स्थानमा शैक्षिक भ्रमण गर्न इच्छुक छौँ । सम्बन्धित स्थानमा पुगेर त्यहाँको प्राकृतिक, सामाजिक तथा अन्य महत्त्वपूर्ण पक्षको प्रत्यक्ष अवलोकन गर्ने हाम्रो उद्देश्य रहेको छ । त्यसैले भ्रमणका लागि आवश्यक यातायात तथा अन्य सम्पूर्ण व्यवस्थापन मिलाइदिनुहुन विनम्र अनुरोध गर्दछौँ । हाम्रो शैक्षिक हितलाई ध्यानमा राखी यस निवेदनमाथि सकारात्मक निर्णय गरिदिनुहुनेछ भन्ने आशा राखेका छौँ ।
निवेदक :
कक्षा नौका सम्पूर्ण विद्यार्थीहरू
८. आफ्नो समाजमा देखिएका सामाजिक समस्याबारे छलफल गरी निष्कर्ष कक्षामा प्रस्तुत गर्नुहोस् ।
९. जेहेनदार छात्रवृत्तिका लागि प्रधानाध्यापकसमक्ष निवेदन लेख्नुहोस् :
उत्तर :
मिति : २०७८।०३।०५
श्री प्रधानाध्यापकज्यू,
एभरेस्ट पब्लिक एकेडेमी
मध्यपुर थिमी, सिन्टिटार, भक्तपुर ।
विषय : छात्रवृत्ति उपलब्ध गराइदिनुहुन ।
महोदय,
म यस विद्यालयमा कक्षा ९ मा अध्ययनरत विकास बुढाथोकी हुँ । मेरो परिवार आर्थिक रूपमा कमजोर अवस्थामा रहेको छ । चार सदस्यीय परिवारको दैनिक आवश्यकता पूरा गर्न नै कठिन भइरहेको अवस्थामा बढ्दो महँगीका कारण मेरो पढाइको खर्च जुटाउन बुबाआमालाई थप समस्या परेको छ । यस्तो परिस्थितिका कारण मेरो अध्ययनलाई निरन्तरता दिन कठिन हुने अवस्था आएको छ ।
शैक्षिक क्षेत्रमा मैले कक्षा ८ मा तृतीय स्थान हासिल गरेको छु । पढाइबाहेक विद्यालयमा हुने विभिन्न अतिरिक्त क्रियाकलापमा पनि मेरो सक्रिय सहभागिता रहँदै आएको छ । खेलकुद तथा बौद्धिक कार्यक्रममा सहभागी भएर विभिन्न पदक प्राप्त गर्नसमेत सफल भएको छु ।
त्यसैगरी, म विद्यालयको बालक्लबमा सक्रिय सदस्यका रूपमा संलग्न रही बालबालिकामा चेतना फैलाउने काममा पनि सहभागी हुँदै आएको छु । आफूले जानेका र सिकेका विषयहरू अरूलाई सिकाउने प्रयाससमेत गर्दै आएको छु । मेरो आर्थिक अवस्थाका कारण अध्ययन रोक्नुपर्ने परिस्थिति नआओस् भन्ने उद्देश्यले जेहेनदार छात्रवृत्ति उपलब्ध गराई पढाइलाई निरन्तरता दिन सहयोग गरिदिनुहुन हजुरसमक्ष अनुरोध गर्दछु । मेरो अवस्था र शैक्षिक उपलब्धिलाई विचार गरी छात्रवृत्ति प्रदान गरिदिनुहुनेछ भन्ने अपेक्षा गरेको छु ।
निवेदक :
विकास बुढाथोकी
कक्षा : ९
१०. पालिका स्तरीय वक्तृत्वकला प्रतियोगितामा प्रथम भएकी छात्रालाई बधाई पत्र लेख्नुहोस् :
उत्तर :
**हार्दिक बधाई**
राष्ट्रिय महिला आयोगद्वारा आयोजित पालिकास्तरीय वक्तृत्वकला प्रतियोगितामा प्रथम स्थान प्राप्त गर्न सफल हुनुभएकोमा तपाईँलाई हार्दिक बधाई व्यक्त गर्दछौँ । तपाईँको यो उल्लेखनीय सफलताले व्यक्तिगत रूपमा मात्र नभई विद्यालय र कक्षा ९ का सम्पूर्ण विद्यार्थीहरूको गौरवसमेत बढाएको छ । आगामी दिनमा अझ उत्कृष्ट सफलता प्राप्त गर्दै निरन्तर प्रगति गर्नुहुनेछ भन्ने शुभकामना व्यक्त गर्दछौँ ।
नौ कक्षाका सम्पूर्ण विद्यार्थीहरू
११. श्रद्धाञ्जली तथा समवेदना पत्र तयार गर्नुहोस् :
उत्तर :
जन्म : वि.सं. २००० भदौ २०
मृत्यु : वि.सं. २०७९ जेठ ९
**भावपूर्ण श्रद्धाञ्जली तथा समवेदना**
नागार्जुन साहित्य समाजका अध्यक्ष श्री किशोर पहाडीको वि.सं. २०७९ जेठ ९ गते ७९ वर्षको उमेरमा भएको निधनले नागार्जुन साहित्य समाज परिवारलाई अत्यन्त दुःखी र मर्माहत बनाएको छ । उहाँको निधन समाजका लागि ठूलो क्षति हो ।
यस दुःखद् क्षणमा दिवङ्गत आत्माको चिरशान्तिको कामना गर्दै उहाँप्रति भावपूर्ण श्रद्धाञ्जली अर्पण गर्दछौँ । साथै, शोकसन्तप्त परिवारजनप्रति गहिरो समवेदना व्यक्त गर्दै यस असह्य पीडा सहन सक्ने शक्ति प्राप्त होस् भन्ने कामना गर्दछौँ ।
अध्यक्ष एवम् सम्पूर्ण नागार्जुन साहित्य समाज परिवार
१२. म्यासेन्जर र टेलिफोनका बीचको संवाद प्रस्तुत गर्नुहोस् :
म्यासेन्जर : नमस्कार, टेलिफोनज्यू, सन्चै हुनुहुन्छ ? आज कतैतिर हिँड्नुभएको जस्तो देखिन्छ नि ?
टेलिफोन : नमस्कार, म सन्चै छु । हजुरको हालखबर कस्तो छ ? म दूरसञ्चारतिर जाँदै छु भन्ने कसरी थाहा पाउनुभयो ?
म्यासेन्जर : तपाईँलाई बेलाबेलामा एउटा समस्या आइपर्छ रे नि । यताबाट बोलेका कुरा उतातिर स्पष्ट रूपमा सुनाउन सक्नुहुन्न भन्ने सुनिन्छ ।
टेलिफोन : हो, कहिलेकाहीँ बोल्ने र सुन्ने व्यक्तिबिचको संवाद स्पष्ट रूपमा पुर्याउन नसक्दा समस्या हुन्छ । तपाईँलाई त त्यस्तो समस्या पर्दैन होला । बोलेको कुरा कसैले बुझेन भने लेखेर पनि पठाउन सक्नुहुन्छ नि, होइन ?
म्यासेन्जर : हो, मलाई त्यस्तो अप्ठ्यारो हुँदैन । बोलेको कुरा नबुझेमा लिखित सन्देश पठाउन सकिन्छ । तर तपाईँले त्यसरी लेखेर पठाउन सक्नुहुन्न ।
टेलिफोन : त्यसैले त अहिले धेरै मानिसले मेरो तुलनामा तपाईँलाई बढी प्रयोग गर्न थालेका छन् ।
म्यासेन्जर : तर मेरो प्रयोगका लागि इन्टरनेट अनिवार्य हुन्छ । सबै ठाउँमा इन्टरनेटको सुविधा उपलब्ध हुँदैन । नेट नभएको ठाउँमा भने तपाईँकै आवश्यकता बढी पर्छ ।
टेलिफोन : त्यो कुरा पनि सही हो । अब मलाई ढिला हुँदै छ, त्यसैले अहिलेका लागि बिदा हुन्छु ।
म्यासेन्जर : हुन्छ, फेरि भेटेर गफ गरौँला । नमस्कार ।
टेलिफोन : हवस्, नमस्कार ।
(दुवै आआफ्नो बाटोतिर लाग्छन् ।)
१३. घरमा आउने अतिथिको स्वागत गर्ने तरिका अभिनयमार्फत प्रस्तुत गर्नुहोस् :
उत्तर :
घरमा अतिथि आउनुभएपछि सर्वप्रथम नमस्कार गरी आत्मीयतापूर्वक स्वागत गर्नुपर्छ । उहाँलाई उपयुक्त स्थानमा बस्न आग्रह गरी पानी, चिया वा आवश्यक अन्य सत्कारको व्यवस्था गर्नुपर्छ । त्यसपछि उहाँको स्वास्थ्य तथा यात्राका बारेमा सोधपुछ गर्न सकिन्छ । यदि कुनै विशेष उद्देश्यले आउनुभएको हो भने त्यससम्बन्धी आवश्यक कुराकानी र सहयोग गर्नुपर्छ । विशेष काम नभएमा पनि केही समय रमाइलो तथा आत्मीय संवाद गरेर पाहुनालाई सहज र सम्मानित महसुस गराउनुपर्छ ।
🎧 सुनाइ र बोलाइ
१. सुनाइ पाठ ४ का आधारमा ठिक वा बेठिक छुट्याउनुहोस् :
(क) हुम्ला शिक्षक परिषद्ले सम्मान प्रदान गरेको छ ।
=> उत्तर: बेठिक
(ख) सम्मानित हुने व्यक्ति विद्यालयका प्रधानाध्यापक हुन् ।
=> उत्तर: ठिक
(ग) विद्यालयको आर्थिक पक्षको उन्नयनमा हरिको उल्लेख्य भूमिका देखिन्छ ।
=> उत्तर: बेठिक
(घ) उक्त कार्यक्रम २०७८ असार १५ गते भएको हो ।
=> उत्तर: ठिक
२. सम्मान पत्रमा समावेश हुने विषयवस्तुहरू बताउनुहोस् :
=> उत्तर: सम्मान पत्रमा सम्मान गर्ने संस्था, सम्मानित व्यक्तिको नाम तथा परिचय, उहाँले गरेका उल्लेखनीय कार्य, उहाँ आबद्ध रहेको संस्था, संस्थाको उन्नतिमा उहाँले पुर्याएको योगदान, कार्यक्रममा उपस्थित अतिथि तथा प्रमुख अतिथि, सम्मान प्रदान गर्ने संस्थाका अध्यक्ष र उहाँको पद तथा संस्था, सम्मान गरिएको साल, मिति र गते आदि विवरण उल्लेख गरिन्छ ।
🔤 भाषिक संरचना र वर्णविन्यास
२. अनुच्छेदमा रहेका तत्सम, तद्भव र आगन्तुक शब्द छुट्याउनुहोस् :
आदर्श, जीवन, भीम र प्रतीक्षा करिब आधा घण्टा हिँडेर अखबार किन्न पसल गए । त्यहाँ मानिसको भिड थियो । उनीहरूले अखबारमा प्रकाशित समाचारको शीर्षक मात्र हेर्दै गए । उनीहरूले नयाँ वर्षको अवसरमा इन्टरनेट जोड्न छुट दिइएको सूचना ध्यान दिएर पढे । उनीहरूले घर फर्कँदा डेरीमा पसेर दुध, दही र पनिर किनेर ल्याए ।
उत्तर :
तत्सम : आदर्श, जीवन, भीम, प्रतीक्षा, घण्टा, प्रकाशित, समाचार, शीर्षक, वर्ष, अवसर, छुट, सूचना, ध्यान
तद्भव : आधा, पसल, मानिस, भिड, नयाँ, घर, दुध, दही
आगन्तुक : करिब, अखबार, इन्टरनेट, डेरी
३. पाठबाट दुई-दुईओटा तत्सम, तद्भव र आगन्तुक शब्द लेख्नुहोस् :
उत्तर :
तत्सम : संरक्षण, उद्देश्य
तद्भव : गाउँ, बाटो
आगन्तुक : साइबर, क्लब
४. मूल र व्युत्पन्न शब्द छुट्याएर लेख्नुहोस् :
उत्तर :
मूल शब्द : सुन्दर, रचना, जय, देश, दाजु, तिमी, राम्रो, कवि, बहिनी, कुरा, अरु, रवि, गुरु, निकै, चर्चा, थाहा ।
व्युत्पन्न शब्द : आकृति, प्रकृति, कविता, एउटा, पढेर, विजय, सञ्जय, विदेश, गएका, कृति, कृतित्व, सम्भावना, सैद्धान्तिक, विद्यालय, रवीन्द्र, कवीन्द्र, रक्षा, गुरुमा, सुरक्षा, परिचर्चा ।
५. पाठको तोकिएको अनुच्छेदबाट पाँचओटा व्युत्पन्न शब्द टिप्नुहोस् ।
=> उत्तर: सचेतना, घरेलु, सामाजिक, लैङ्गिक, सञ्चार
६. आफ्नो अध्ययनबारे छोटो अनुच्छेद लेखी मूल र व्युत्पन्न शब्द छुट्याउनुहोस् ।
=> उत्तर: म हरेक दिन आफ्नो अध्ययनका लागि निश्चित समय छुट्याउँछु । दैनिक चार घण्टा पढ्ने प्रयास गर्छु र विद्यालयबाट प्राप्त गृहकार्य समयमै पूरा गर्छु । अध्ययन गर्दा विषयलाई केवल कण्ठ गर्नेभन्दा त्यसको अर्थ बुझेर सिक्न रुचाउँछु । नियमित अभ्यास र मेहनतले पढाइमा सुधार ल्याउन सकिन्छ भन्ने कुरामा म विश्वास गर्छु । मेरो अध्ययनप्रतिको लगनशीलता देखेर परिवारका सदस्यहरू पनि खुसी हुनुहुन्छ ।
७. अनुच्छेदबाट सुरु, बिच र अन्तिममा दीर्घ ऊकार भएका शब्द पहिचान गर्नुहोस् :
पूणर्माया लिम्बूले आफ्नी साथी विभूतिका लागि स्विटर तयार पारेकी थिइन् । उनकी माइजूले हेरूँ हेरूँ लाग्यो भन्दै उक्त स्विटर आफूलाई दिनू भन्ने आग्रह गर्नुभयो । स्विटर बन्नुपूर्व नै फुपू र भाउजूले पनि त्यस्तै माग गरेकाले कसो गर्ने होला भनी सोच्न थालिन् ।
=> उत्तर: सुरुमा दीर्घ ऊकार :** पूणर्माया, पूर्व
बिचमा दीर्घ ऊकार : विभूति
अन्तिममा दीर्घ ऊकार : लिम्बू, माइजू, हेरूँ, आफू, दिनू, फुपू, भाउजू
८. सुरु, बिच र अन्तिममा दीर्घ ऊकार भएका पाँच-पाँचओटा शब्द लेख्नुहोस् :
उत्तर :
सुरुमा दीर्घ ऊकार : सूर्य, सूक्ति, भूत, भूमि, पूजा
बिचमा दीर्घ ऊकार : पीयूष, अनुभूति, समूह, सपूत, अभूत
अन्तिममा दीर्घ ऊकार : हुस्सू, बुद्धू, माइजू, भाउजू, कविज्यू